ورد الميدان
إلى ثوار ميدان سعد زغلول بالإسكندرية
شعر: خالد إسماعيل
1
طالعين، من قلب الخراب الكبير
وَرد بيسبَّح لربُّه..
زيّ عصفور الجناين، وسط قطعان النسور الجارحة
حلوين بأخلاقهم، بيحبوا "مصر" بدون حِسَب
صدقوني: لسّه فيه شُبّان فِ مصر..
صدقوني: لسّه فيه أبطال بيتحدوا الرَّصَاص
والأمن والبلطجية الكبار..
لسّه فيه شجعان بيتحدوا "اللواءات" اللي باعوا
عرضنا واستعبدونا..
لسّه فيه أولاد رجال، كبروا قوام قبل الأوان
تحت قهر أعوان المباحث وقنابل الدخان
هديّة الأمريكان، للنظام العميل!
2
صدقوني: لسه رب الكون ما قررشي إنه يخلق حد يقدر
يخنق الثورة بحبّة كدّابين، أو شوّية دجّالين
بدقون.. ولا بشوية عيال ناعمين، يترقصوا جوّه
الشاشات الخاينه للمعنى النبيل!
لسّه قلب النيل بينبض بالحياه..
لسّه فيه رغم الشقا والجوع حياه..
تستحق نموت عشانها فِ الميدان
وفِ المفارق والشوارع، فجر حلم الشعب شقشق
غصب عن عين الصهاينة..
غصب عن عين اللي خان!
يوليو 2011
الإسكندرية
